பிரதேச செயலகம் - உடுவில்

புதிய தொழில்நுட்பத்துடன் இணைந்த வினைத்திறனும் பயனுறுதியும் கொண்ட பொதுச்சேவை வழங்கும் உன்னத நிறுவனம் ஆதல்.

மக்களின் அபிலாசைகளுக்கும், அடையாளம் காணப்பட்ட தேசிய முன்னுரிமைகளுக்கும் ஏற்றதாக, மக்களின் பங்களிப்புடனான நிலைபேறான பிரதேச அபிவிருத்திக்கு வினைத்திறனும் பயனுறுதியும் கொண்ட பொதுச்சேவையை உத்தரவாதப்படுத்தல்.

வலிகாமம் தெற்கு (உடுவில்) பிரதேச செயலகப் பிரிவு இலங்கையின் யாழ்ப்பாண மாவட்டத்தின் மையப்பகுதியில் அமைந்துள்ளது. வடக்கில் வலிகாமம் வடக்கு (தெல்லிப்பழை) பிரதேச செயலகப் பிரிவும், கிழக்கில் வலிகாமம் கிழக்கு (கோப்பாய்) பிரதேச செயலகப் பிரிவும், தென்கிழக்கில் நல்லூர் பிரதேச செயலகப் பிரிவும், மேற்கில் வலிகாமம் தென்மேற்கு (சண்டிலிப்பாய்) பிரதேச செயலகப் பிரிவும் எல்லைகளாக அமைந்துள்ளன. இப்பிரதேச செயலகப் பிரிவில் 30 கிராம அலுவலர் பிரிவுகள் உள்ளன. பெரும்பாலான கிராமங்கள் செம்மண் வகையைச் சார்ந்த நிலங்களைக் கொண்டவையாகும். குப்பிழான், ஏழாலை, புன்னாலைக்கட்டுவன், ஈவினை, சுன்னாகம், கந்தரோடை, உடுவில், இணுவில், தாவடி மற்றும் சங்குவேலி ஆகிய கிராமங்களில் பணப்பயிர் வகைகள், வெங்காயம், மரக்கறி போன்றவற்றைப் பயிரிடுவதற்கு ஏற்ற வளமான மண்வகை உள்ளது.

சுன்னாகம் நகரப் பகுதி இப்பிரதேச செயலகப் பிரிவின் வடக்கு எல்லையில் அமைந்துள்ளதுடன், நகரத்துக்குரிய அம்சங்களைக் கொண்டுள்ளது. குறிப்பாக விவசாய அபிவிருத்திக்கும் விவசாயம் சார்ந்த கைத்தொழில் அபிவிருத்திக்கும் இப்பகுதி ஏற்ற இடமாக அமைந்துள்ளது.